今日下午国际冠军盃澳洲站在墨尔本拉开战幔，上届盟主西甲班霸皇家马德里隆重登场硬撼意甲罗马，「银河舰队」两大王牌C朗同加里夫巴利一向有心病，但新帅宾尼迪斯竟然火上加油，想以「大圣爷」为进攻核心改打中锋，摆明唔畀面C朗，「肥宾」冇嘢搵嘢嚟搞自乱阵脚，随时畀罗马偷到鸡，仲有得受让必捧让球客胜。

（有线61、64、201及203台周六下午5时直播）

卡士有限 带唔掂巨型班

今届国冠盃皇马分别会于澳洲同中国踢4场波，非常频扑，佢哋今日就展开第一击，先喺澳洲墨尔本出战意甲劲旅罗马。「银河舰队」今夏邀请宾尼迪斯取代安察洛堤接掌兵符，呢个决定惹人非议，一来安察洛堤前届先带队勇夺欧联，上季冇货交即炒太不近人情，二来宾尼迪斯卡士有限，连拿玻里都带唔掂，点样管得掂球星如云嘅「银河舰队」呀？

皇马两大王牌C朗同加里夫巴利上季屡传不和，试过后者入波C朗竟黑面，而「大圣爷」喺C朗阴影下亦坦言踢得唔开心。不过宾尼迪斯一于少理，仲想硬推巴利仔为进攻核心，《马卡报》大爆「肥宾」安排佢打中锋，而《阿斯报》更刊登两人有讲有笑嘅相做头条，关係匪浅。如果「大圣爷」出任中锋，并畀佢有足够射门嘅自由度，即係直接分薄咗C朗嘅得分机会，而且呢位葡萄牙万人迷做惯大佬，点会甘心屈居人下，仲要係同佢有心病嘅「大圣爷」，C朗唔发癫就奇。虽然暂未传出两人吵大镬消息，但「肥宾」咁做等同埋下计时炸弹冇分别，迟早出事。

托迪领军 顶得住皇马

罗马今季变动唔大，传闻会走人嘅谢云奴同艾殊利高尔仍在大军名单，当然唔少得38岁嘅「老王子」托迪，而且啱啱同两大中场悍将施度基达及尼恩高兰续约，稳定军心。如今皇马内部不和，卖走门将兼队长卡斯拿斯，沙治奥拉莫斯有离心，又未斟掂曼联神龙迪基亚过档，占士洛迪古斯又因踢完美洲盃冇耐未归队，呢类季前「拍跳」仲要让波实在信唔过，斯维宁捧罗马让球客胜。